மகளதிகாரங்கள் - 1

These are the tweets that I tweeted about my daughter. Most of them are from real experiences though few of them are decorated with imagination.

• 'அப்பா, நானே உனக்கு வொய்ப்பா (wife) இருக்கிறேன். அம்மா, வேணாம்பா' என்கிறாள் மானு. :) #Pocessive

• 'அம்மா, அது கருப்பு cow தான், buffalo கிடையாது. எனக்கு தப்பு தப்பா சொல்லித் தராதே' - என் மகள். :)

• மானு ரொம்ப அமைதியானவள் - தூங்கும்போது. ;)

• மானு நெயில் பாலிஷ் போட்டுக் கொண்டு, தான் நகங்களை பார்த்தபடி எல்லோருக்கும் உள்ளங்கையை காட்டுகிறாள். #மழலை

• குழந்தை வளர்ப்பில் தலைசிறந்தவர் யாரவது இருக்கிறார்களா - மானுவை சிறந்த முறையில் வளர்க்க டிப்ஸ் தேவை எனக்கும், என் அம்மாவுக்கும். #புரிந்ததா?

• வெறும் கையை கொடுத்து சாக்லேட் சாப்பிடு என்றாள் மகள். சரின்னு சாபிட்டா, 'அச்சோ, பேப்பர் பிரிக்காமே சாப்பிட்றியே' என்கிறாள். #இன்றைய பல்பு

• நான் airplane வரைந்து, என் மகளிடம் இது என்ன என்றால் fish என்கிறாள். #இன்றைய பல்பு

• 'மானு, சாபிடலன்னா பூச்சாண்டி வந்துடும். ஒழுங்கா சாப்புடு.' - நான். 'அம்மா, நா சாபிடல, பூச்சாண்டிய காட்றியா ப்ளிஸ்' - மானு #பல்பு

• 'திரும்ப திரும்ப விளையாடுற நீ (2)' என்று மானுவை பார்த்துதான் சொல்லவேண்டும். விளையாடினதையே மறுபடி (2) விளையாடச்சொல்லி...#முடியலே :)

• வெச்சா குடுமி கதைதான் மானுவிடம். ஒன்று தண்ணியே குடிக்கமாட்டாள், அல்லது அரை பாட்டில் குடிப்பாள் அதுவும் சரியாக சாப்பாட்டிற்கு முன் :)

• எதிர் வீட்டில் இருப்பவர் டீச்சர் என்றால் மானு நம்பமாட்டாள். போம்மா, அவங்க ஆண்ட்டிதான் என்பாள். அவரே இதை கேட்டு சிரிப்பார். :)

• குழந்தையின் எந்த வேலையிலும் தலையிடாத அவரைப்பார்த்து மானு கேட்கிறாள் "அப்பா, உனக்கு fridge தொறக்க வருமாப்பா" :)

• இன்று மானு சொன்னது - அம்மா, எனக்கு கருப்பு பூனை பிடிக்காதும்மா, வெள்ளை பூனைதான் பிடிக்கும். :( # பிஞ்சுக்குள் நஞ்சு

• என் மாமியார் 'நான் வீட்டுக்கு வரட்டுமா' என்று மானுவிடம் ஃபோனில் கேட்டார். அவள் என்னை பார்த்து 'பாட்டி நம்ம வீட்டுக்கு வரட்டுமாம்மா' கேட்கிறாள். #அவ்வ்

• என் இறந்து போன தந்தைக்கு என் மகள் விளையாட்டுக்கு போன் செய்து, 'ஏன் தாத்தா அம்மாவை விட்டுட்டு போயிட்டே? அம்மா பாவம் இல்லையா' என்கிறாள்

• 'அம்மா, நான் நல்லா சாப்பிடுவேன். அப்போதான் பலசாலி ஆக முடியும்' - மானு. // பேசும்போது நல்லா வக்கணையா பேசு. எழும்போது கோட்ட விட்டுடு.

• மானுதான் உண்மையான கீச்சர். மெதுவா பேசணும்னு எவ்ளோ சொன்னாலும் கீச்சு கீசுன்னு கத்தி கத்தி பேசுறா. :)

• என் மகளுக்கு என்ன கதை சொன்னாலும், அவள் கண்கள் விரித்து கேட்கும் விதமே தெரிகிறது, அதை மனதில் காட்சிகளாக்கி பார்த்துக்கொண்டிருக்கிறாள் என்று

• Straight line என்று வரைந்து காட்டினால், ’அம்மா, lion இப்படி இருக்காது’ என்று தன் கதை புக்கிலிருந்து சிங்கம் காட்டுகிறாள் என் மகள்.

• நான் இனிமே எதிர்வீட்டு குழந்தைக்கு பொம்மை வாங்கிக் கொடுக்கலாம்னு இருக்கேன். அப்போதான் எம்பொண்ணு அதுகூட விளையாடுவா. :D

• பல்தேச்சி பல்தேச்சி காபி குடி'ன்னு பாடுறா என்பொண்ணு #பர்தேசி பர்தேசி ஜானா நஹின்.

• மானுவின் அத்தை விஜிக்கு இன்னொரு பேர் விஜயஸ்ரீ என்றேன். இன்னொரு நாள் அனுமாருக்கு வேற பேர் என்னன்னு கேட்டதுக்கு, மகள் அனுமஸ்ரீ என்கிறாள். #PresenceOfMind

• எங்கள் வீட்டு வாசலில் எப்போதும் இரு கோலங்கள். ஒன்று கொஞ்சம் தெளிவாக, இன்னொன்று ரொம்ப அழகாக (என் மகள் போடுவது).

• மகள் திறக்கக்கூடதுன்னு வாஷ் பேசின் குழாயை கீழே மூடிவிட்டு, ஏதோ நினைவில் மேல் குழாயை திருகினால், அவ சொல்றா - அம்மா, கீழே மூடிருக்கும்மா.

• குழாய் வாமிட் பண்ணுது, அந்த தண்ணிய ஏம்மா எம்மேல ஊத்தரே என்கிறாள் மகள் அவளை குளிப்பாட்டுகையில். :)

• எங்க கல்யாண நாளின் போது எவ்வளவு முறை நான் 'எனக்கும் அப்பாவுக்கும் கல்யாண நாள்'ன்னு சொன்னாலும், ஒவ்வொரு முறையும் 'அப்படி இல்லைம்மா, எனக்கு, உனக்கு, அப்பாவுக்கு கல்யாண நாள்ன்னு சொல்லு'ன்னு சொல்லிட்டே இருந்தாள் ;-) #Pocessive

• சாப்பிடாமல் படுத்திய சமயத்தில், மகளுக்கு புரியாத கன்னடத்தில் அவரிடம், 'நீ சாப்பிட்டு முடிச்சாதான் பேசுவேன்'ன்னு சொல்லுங்கன்னேன். ஆனா அவர் சொல்லலை. ஓரிரு நொடிகள் கழித்து இவள் 'அம்மா, அப்பா ஒண்ணுமே என்கிட்டே சொல்லலேம்மா'ங்கிறா. #வேறெந்த மொழியில பேசணும்னு தெரியல எங்களுக்கு.

• என் பொண்ணுக்கு ஹாப்பி வாலன்டைன் டேன்னு சொன்னா, ஹாப்பி பர்த் டேன்னு சொல்லும்மா. எனக்கு அதுதான் பிடிக்கும்ங்கறா.

• பள்ளியில் சொல்லிக்கொடுத்த மெடிட்டேஷனை எங்களுக்கு சொல்லிக் கொடுத்தாள். நன்றாக கண்ணைமூடினால், 'அப்படி இல்லைம்மா, லைட்டா ஒரு கண்ணை திறந்து பார்க்கலாம், நாங்கெல்லாம் அப்படிதான் செய்வோம்'ங்கிறா. அவ்வ்

• என் சாதாரண ஜுரத்திற்கும் உடனே டாக்டரைப் பார்க்க வைக்கிறாள் மகள். இல்லாத என் அப்பாக்கு போன் செய்து 'தாத்தா, உங்க பொண்ண கூட்டிட்டு போங்க'.

• சுழல் நாற்காலியில் விளையாடும் மகளிடம் ஒரு வாய் சாப்டுட்டு சுத்துன்னு சொன்னா, 'இரும்மா, கணேஷா மாதிரி மூணுதடவ சுத்திட்டு அப்புறம்'ங்கிறா.

• 'டேபுள் மேல ஏறி விழுந்து மண்டைய ஒடெச்சுக்காதடி' ன்னு மகளுக்கு சொன்னா, அவ 'அப்ப, கணேஷா மாதிரி எலிஃபண்ட் தலைய எனக்கு வெச்சிடு' என்கிறாள்.

• எங்கள் நெய்பர்'ருக்கும், என் அண்ணனுக்கும் ஒரே பேர் என்பதால், என் மகள் பிரசாத் அங்கிள், பிரசாத் மாமான்னு தெளிவா கூப்பிடுறா.

• மானுவுக்கு எதையாவது சாப்பிடக் கொடுத்து எப்படி இருக்குன்னு கேட்டா 'பிடிக்கல'ன்னு சொல்லாம, 'நல்லா இருக்கு, எனக்கு போதும்'ன்னு சொல்லுவா.

• மானுவின் பொருளை யாராவது கேட்டால், 'கொடுக்க மாட்டேன்'னு சொல்லாமல் 'புதுசு வாங்கித்தரேன்' என்பாள். :D

• அபார்ட்மெண்ட்டில் ஒரு புதிய சிறுமி என் மகளின் பெயரை கேட்டாள். மானு பதில் சொன்னாள். அச்சிறுமி சொன்னது 'அப்ப நீ கேர்ல்லா?' #சம்மர்-கட்

• நான் 'சின்ன வயசில் எங்க டீச்சர் பெரிய கொம்பால அடிப்பாங்க'ன்னு என் பொண்ணுகிட்ட சொன்னா, எங்க மிஸ்ஸு ஸ்கேல்லாலதாம்பா அடிப்பாங்கங்கிறா. அவ்வ்

• ஒரு van'ன் பின்பக்கம் எரியும் சிகப்பு விளக்குகளை பார்த்து என் மகள் கேட்கிறாள் 'ஏம்மா அந்த van கோவமா பார்க்குது?' எப்படி தோணுதோ அவளுக்கு?

• சடி, பரியது, சருப்பு - ஒற்றைக் கொம்பு வார்த்தைகள் உச்சரிக்க வராத என் மகளுடைய மழலை வார்த்தைகள். :-)

• நான் டீச்சராக இருந்தால், 'மிஸ், சாய் பிஞ்சிங் / கீதா பீட்டிங்'ன்னு என்னை பாடம் எடுக்க விடாமல் யார் மீதோ புகார் கொடுத்துக் கொண்டே இருப்பாள்

• டீச்சர் விளையாட்டில் என் மகள் ஸ்ட்ரிக்ட் டீச்சர் ஆகி, என்னை மக்கு பிள்ளை ஆக்கிவிடுகிறாள். :)

• ம்ம், ம்ஹூம், தலையாட்டுதல் போன்றவற்றை communicationனாகவே எடுத்துக்க மாட்டா என் பொண்ணு. எம்மா ம்ம் சொல்ற, என்கிட்டே பேசமாட்டியா என்பாள்.

• எந்த கதையை சொன்னாலும் மகள் 'அங்கே அழைச்சிட்டு போம்மா'. அது வெறும் ஸ்டோரி'மா என்றால் அந்த ஸ்டோரிக்குதான் அழைச்சிட்டுப் போ என்கிறாள். கதை சொல்லலாம், கதைன்னா என்னன்னு எப்படி சொல்றது.

எனது குட்டி(க்கு) விருதுகள்

இது விருதுகளுக்கான சீசன். நான் வித்யாசமாக prepare செய்ய ஆரம்பித்தால், ஓரளவு விருதுகள் தேறியது. இவை அனைத்தும் நான் என் மகளுக்கு கொடுக்கும் விருதுகள். 

1. ஆள் மயக்கி விருது - சிறுவர்கள் முதல் பெரியவர்கள் வரை, புதிதாக சந்தித்தாலும் எப்படியோ அனைவரையும் attractட்டி விடுவாள்.  

2. சிறந்த கதை சொல்லி விருது - வெறும் பறவைகள்/ மிருகங்கள் உள்ள புத்தகத்தை வைத்தே கதையை இட்டுக் கட்டி சொல்லிவிடுவாள்.

3. 'தல' விருது - நான் 'தல' ரசிகைன்னா, என் மக 'walk' ரசிகை. எப்போதும் நடந்துகொண்டே இருப்பாள்.

4. இருட்டு கடை அல்வா விருது - இரவு 11 மணி ஆனாலும் விளக்கெல்லாம் அனைத்து விட்டிருந்தாலும் ஏதோ விளையாடிக் கொண்டே இருப்பாள்.

5. எது உன்னுதோ அது என்னுது, எது என்னுதொ அதுவும் என்னுது விருது - இந்த விருது 'Self explanatory'.

6. என் friendட போல யாரு மச்சான் விருது - ஒருநாள் நானும் அவளும் ஒரே கலரில் உடை உடுத்தி இருந்ததால், அவ பாடின பாட்டு. அடுத்த நாளே பள்ளியிலிருந்து வந்தவுடன், அதை கொஞ்சம் மாற்றி 'என் friend நிரஞ்சன் போல யாரு மச்சான்'ன்னு பாடினாளே பார்க்கணும்.

7. Baby Engineer - மொபைல், ரிமோட் எதுவா இருந்தாலும் பேட்டரியை கழட்டி, மறுபடி பொருத்தத் தெரியும்.  

8. Talent Inducer - எனக்குள் இருந்த சமையல் திறமையை வெளிக்கொணர்ந்தவள். அவ்வ்   

9. Home Food Eater (?!) - ஹோட்டலுக்கு போனால் நாங்கள் நன்கு சாப்பிட, அவ வெறும் அந்த சாலட்ல இருக்குற வெங்காயத்தை மட்டும் சாப்பிட்டு, டம்ப்ளர் நிறைய தண்ணி குடித்து, வீட்டுக்கு வந்தபின் youtube பார்த்துக் கொண்டே இட்லியை சாப்பிடுவதால்.      

10. Baby. Complaint - சதா எதை/யாரைப் பற்றியாவது புகார் சொல்லிக் கொண்டே இருப்பதால்.  

11. Best Adviser - மற்ற குழந்தைகளுக்கு அட்வைஸ் மழை பொழிவதால். (துப்ப கூடாது, ஒழுங்கா சாப்பிடனும்; குட் கேர்ள்ளா இருக்கணும் etc.)  

12. Best Entertainer - அடுத்தாத்து அம்புஜத்தை பாட்டை முழுதாக, ஓரளவு ஆக்க்ஷனுடன் பாடுவாள். Youtube புண்ணியத்தில் தென்னிந்திய மொழிகள் எல்லாவற்றிலும் தலா ரெண்டு ரைம்ஸ்சாவது சொல்லுவா.    

13. Best Nose-Cutter - அவளுடன் பழகும் எல்லாருக்கும், ஒரு மூக்குடைப்பாவது உறுதி. ஒருமுறை நான் ஏரோப்ளேன் வரைந்தால், அதை மீன் என்று சொன்னாள்.

14. Selective Appetite - முறுக்கு, சிப்ஸ் தவிர மற்ற எல்லாமே, அவ மூட் பொறுத்துதான். அல்லது அவ சாப்பிடுவது அந்நாளில் என் அதிர்ஷ்டத்தைப் பொருத்தது. பெரும்பாலும் எனக்கு துர்-அதிர்ஷ்டம் தான்.        

15. பேசும்போது நல்லா வக்கணையா பேசு விருது - 'அம்மா, நல்லா சாப்பிட்டாதான் பலசாலியா இருக்கலாம். நான் இனிமே நல்லா சாப்பிடுவேன்மா'ன்னு சொல்லிட்டு, செயல்ன்னு வரும்போது என் பொறுமையை சோதிப்பாள்.  

16. Baby Slim Beauty - மேல் சொன்ன காரணங்களுக்காக அவ மிக ஒல்லியா இருப்பா. எனவே இந்த விருது. 

17. Terror Teacher - டார்க் ரூம்ல போட்டுடுவேன், அம்மாகிட்ட அனுப்ப மாட்டேன்ன்னு ஒரு டசன் பயங்களைக் காட்டுவாள் அவள் டீச்சர்ராக இருக்கும் விளையாட்டில்.    

18. Take It Easy - எங்க விழுந்து எங்க அடிப்பட்டாலும், சாதரணமா எழுந்து போயிட்டே இருப்பா. இல்லன்னா 2 mins நூடுல்ஸ் மாதிரி அழுகை.  

19. Best Accommodative Baby - எனக்கு உடம்பு முடியாதபோது, ஒரு வாரம் என்னை விட்டு அவ அத்தையிடம் சமர்த்தாக இருந்ததால். 

20. Tongue Twister - beach-jeap, kitchen-chicken இவற்றை சரியாக மாற்றி உபயோகிப்பா ஒவ்வொரு முறையும்.  

21. ஜென் Award - அவள் பிறந்த நாளுக்காக 5,6 உடைகளை அவளுக்கு  கொடுத்தபோது 'என் கிட்டதான் நிறைய ட்ரெஸ் இருக்கேம்மா, எதுக்கு இவ்ளோ வாங்கின' ன்னு சொன்னதற்காக. 

22. செல்லம் - மொத்தத்தில் எங்கள் அனைவருக்கும் செல்லம் அவள்.

என்ன, உங்களுக்கும் அவளை பிடித்து போயிற்றுதானே!

எங்கள் வீட்டு கொலு Vs எங்கள் செல்ல வாலு

கடந்த இரண்டு வருடங்களாக டைனிங் டேபுள் மேல் மூன்று படியிட்டு, எங்கள் வீட்டு வால்'லிடமிருந்து காப்பாற்றப்பட்ட கொலு பொம்மைகளை, இந்த வருடம் 'நம்ம மானு பெரியவளாயிட்டா (மூன்று வயது!!), சொன்னா கேட்டுக்குவா. கீழ் நோக்கியே படி வை' ன்னு என்னவர் சொன்னதற்காக அப்படியே  வைக்கப்பட்டது. என்ன இருந்தாலும் காக்கைக்கு தன குஞ்சு பொன் குஞ்சுதானே. :) 

ஒவ்வொரு கொலுவுக்கும் தவறாமல் எட்டிப்பார்ப்பது என் கணவரின்  கடுகடுப்பு,  ஸ்டீல் பலகைகளை முடுக்கி படிக்கெட்டுகளை அவர்தானே அமைக்க வேண்டும் :-D எப்பவும்போல இந்த முறையும் அவரது எரிச்சலை கண்டுக்காமல், சில பல ஜோக்ஸ் சொல்லி (சரி சரி ஜோக் சொல்ல முயற்சி செய்து) கூல் செய்து பொம்மைகளை பரணிலிருந்து இறக்கி, படிக்கெட்டுகள் செட் செய்து வைத்தாயிற்று. "நம்ம வீட்லதான் show case இருக்கே, permanentஆ கொலு பொம்மைகளை இங்கயே வெச்சிடலாமே" என்ற சமயோசித அட்வைஸ்(?!) க்கும் மையமாக சிரித்து வைத்து, பொம்மைகளை துடைக்கும் வேலையில் உட்கார்ந்து  விட்டேன். நான் தான் அடுக்குவேன் என்று அடம்பிடித்து, உதவியில் இறங்கிவிட்டாள் மகள்.

அந்த காலம் போலல்லாமல், சென்னையில் இப்போதுள்ள வழக்கம், ஒன்பது நாளில் ஒருநாள்தான் கொலுவுக்கு அழைப்பார்கள்/வருவார்கள். அதனால் தினமும் சுண்டல் வீணாவதன் கவலை இல்லை. நேற்று அனைவரையும் (20 வீடு) அழைத்தாயிற்று. நேற்று மதியம் முதலே அடை மழை. நானோ அரைகிலோ பட்டாணி காலையில் ஊறப்போட்டு சாயிங்காலம் சுண்டலும் செய்துவிட்டேன். மழை ஒருவழியாக நின்று, ஒருவழியாக  எல்லாரும் வந்து, சுண்டலும் காலியாகிவிட்டது. :)

பெரியவர்களுக்கு பிளாஸ்டிக் டப்பா & ஜாக்கெட் பிட், சிறுவர்களுக்கு பென் & ஸ்கெட்ச் கொடுத்தாகிவிட்டது. மற்றபடி சம்பிரதாயமான பெரியவர்களை - பாடச்சொல்வது, சிறுமிகளை - சினிமா பாட்டானாலும் பாடுன்னு சொல்வது, வாண்டுகளை - ஸ்லோகம் சொல்லச்சொல்வது போன்றவை நடந்தது. வீட்டுக்கு வந்தவங்களுக்கு தண்டனை போல (சுண்டலை சொல்லலீங்க, அது தனி!), என் கணவர், மகளின் புகழை பாடத் தொடங்கி விடுவார். 

இனி என் மூன்று வயது மகளின் விஷமங்கள்:

• பெட்டியிலிருந்து எடுத்த முதல் பொம்மையே பேப்பர் மோல்ட் செய்யப்பட்ட, வாங்கி நான்கைந்து ஆண்டுகள் ஆனாலும், பளபளப்பு குறையாத கஜ லக்ஷ்மி. அவ்வளவு அழகு அந்த பொம்மை. மானு அடம்பிடித்து என்கையிலிருந்து வாங்கி விளையாட ஆரம்பித்துவிட்டாள். போகிறதென்று மற்ற பொம்மைகளை தூசி தட்டி வைக்கும்போது, 'அம்மா, என்னை பாத்து சிரி' என்று அசடு வழிந்தாள் மகள். அவள் அப்படி சொன்னாலே ஏதோ விஷமம் செய்திருக்கிறாள் என்று புரிந்துகொள்ள வேண்டும். என்னவென்று பார்த்தால், அந்த பொம்மையின் தலை வெட்டப்பட்டுள்ளது. :-(

• அவளது பள்ளியில் நவராத்திரி கொண்டாடுவதால், ஒரு ரங்கநாதர் பொம்மை வாங்கி, 'இது உங்க ஸ்கூல் கொலுவுக்கு' என்று சொல்லி அவளிடம் கொடுத்தனுப்பினோம் சென்ற வாரம். எங்கள் வீட்டில் எல்லா பொம்மையும் வைத்த பிறகு, 'மானு, எப்படி இருக்கு நம்ம வீட்டு கொலு' என்றால் அவள் சர்வசாதாரணமாக 'பெருமாள், அனுமார் எல்லாம் வெச்சிட்டே. ரங்கநாதர் பொம்மையே இல்லை. இத போய் கொலுங்கரே?, போம்மா நீ' என்கிறாள். 

• பொம்மையை தொடக்கூடாதுன்னு அவ்வப்போது சொல்லி சொல்லி வைப்பேன் அவளிடம். நேற்று விளக்கேற்றும்போது கவனித்தேன், தசாவதாரத்தில் கல்கி திரும்பி நின்றுக்கொண்டிருந்தார். 'ஏன் மானு இப்படி பண்ணினே?' என்றால், அவள் கூலாக 'அம்மா, அந்த சாமி சாய்பாபவ பாக்கணும்னு சொல்லிச்சு, அதான் திருப்பி வெச்சேன்.' என்கிறாள்.

• எங்கள் வீட்டில் வேலை செய்பவர், மானுவின் முதல் தோழி. அவங்களுக்கு ஒருநாள் சுண்டல் கொடுத்து, அவரும் சாப்பிட்டுக் கொண்டிருந்தார். இவளுக்கு சுண்டல் பிடிக்காது (வேறென்ன பிடிக்கும்னு கேக்காதீங்க. அவளுக்கு எதுமே பிடிக்காது). அதனால் அவர் சாப்பிடுவது பார்க்க பிடிக்காமல் 'ஆன்ட்டி, சுண்டல் எல்லாம் சாப்பிடக் கூடாது, பல்லுல பூச்சி வந்துடும்' என்கிறாள்.  

இதுதான் என்வீட்டு கொலுவின், எங்கள் செல்ல வாலுவின் கதை. 

நீங்க எப்போ வரீங்க எங்க வீட்டு கொலுக்கு?